மதுரை சரவணன்

அரசு மருத்துவமனையில் இப்படியும் நடக்குமா? ? எச்சரிக்கை ரிப்போர்ட்

2012-01-24T10:19:00.000-08:00

இன்று காலை குளித்து முடித்து சாப்பிட அமர்ந்து இருந்தேன். என் அலைப் பேசிக்கு ஒரு கால் வந்தது. வழக்கம் போல யாரோ பெற்றோர் என நினைத்து வணக்கம் சொல்லுங்க என்றேன்.

அலைப் பேசியில் ஒரு பெண்ணின் குரல் … (எனக்கு பெயரை நினைவில் வைத்துக் கொள்ள முடியவில்லை எப்போதும் ஏன் …? )தன் பெயரை சொல்லி உரையாற்றினார். சார் நான் அமெரிக்காவில் பாஸ்டன் நகரில் பணிபுரியும் பெண் மருத்துவர், நான் மதுரைக்கார பொண்ணு தான்.. சௌராஸ்டிரா பள்ளியில் தான் படித்தேன்..உங்கள் பதிவை படித்தேன்… அந்த பையனுக்கு எயிட்ஸ் இருக்கும்..கட்டி இரத்தம் ஒழுகுதல்..வைத்து பார்க்கும் போது இது உறுதி செய்யப்படுகிறது.. இந்தியாவில் எயிட்ஸ் என்பது காமன் விசயம் ஆச்சு… அப்புறம் … அவன் தன் இறுதி நாளை நெருங்கிவிட்டான் என்று தொடர்ந்த பேச்சில் சொல்லுங்க மேம்.. என்று தலை கொட்டி கொண்டதுடன். அவர் சொன்ன விசயம் மேலும் ஆச்சரியம் ஊட்டியது.

இரத்த செல்கள் கிளாட் ஆனவுடன் செத்து விடும் என நீங்கள் சொல்லுவது உண்மைதான் ஆனாலும் , அது பரவ சான்ஸ் உண்டு. காயம் பட்ட இடத்தை சுற்றி வெளிவரும் திரவம் ( நிணநீர்) வைரஸ் தாங்கி அது காயங்களில் படும் போது பரவ வாய்ப்பு உள்ளது. மேலும் பிற மாணவர்கள் தன்னை யாறியாமல் அதை தொட்டு வாயில் வைக்கும் போது பரவ வாய்ப்பு உள்ளது. மேலும் நீங்களும் அவனிடம் கவனமாக கையாளுங்கள்.. என எச்சரித்தார். மேலும் முடிந்தால் டி.சி. கொடுத்து அனுப்பி வையுங்கள் என்றார். அவர் இரத்தம் சம்பந்தமான ஆராய்ச்சி பணியை செய்து வருவதாகவும் கூறினார். எயிட்ஸ் க்கு மருந்தே கிடையாது என உறுதியாக சொல்லுகிறார்.

அரியானவில் இருந்து சத்தியாவிடம் இருந்து ஒரு எஸ்ஸெமெஸ் வாழ்த்தி.

மதியம் ஆர்.வி. எஸ் வாழ்த்தினார்.

இப்படி என்னை மேலும் மெருகேற்றிக் கொண்டுள்ள அனைத்து அன்பு உள்ளங்களால் என் ஆசிரிய பணியில் முழு ஈடுபாட்டுடன் செயல் பட முடிகிறது. என் தாய் தந்தை இருவரும் ஆசிரியர்கள் என்பதால் , ஆசிரிய பணி மீது கொண்டுள்ள ஆசை , ஆர்வம் ஜீனில் கலந்து இந்த ஆசிரிய பணிமேல் தீராத காதலை தானாகவே உருவாகி விட்டது என்பது தான் உண்மை. அதனை மெருகேற்றும் வகையில் பிளாக் மக்கள் அதுவும் வெளிநாட்டு குமரன் போன்றோர் என் பள்ளியில் பயிலும் ஏழைக் குழந்தைகளுக்கு உதவி செய்து வருவது என்னையும் என்னுடன் பணிபுரியும் அனைத்து ஆசிரியர்களுக்கும் ஒரு உற்சாக டானிக்.

காலை மருத்துவ தோழியின் அறிவுரைப்படி அம் மாணவனுக்கு எயிட்ஸ் தானா என்பதை உறுதி செய்ய, அவனை விசாரித்து வர சொல்லி ஆசிரியைக்கு போன் செய்தேன். அவர்களும் பெற்றோர் வீட்டில் தான் இருக்கிறேன் என்று சொல்லி என்னை உற்சாகப் படுத்தினர்.

காலை முதல் பாட வேளை முடிந்து ரவுண்ஸ் போகும் போது , வகுப்பு ஆசிரியரையும் எனக்கு எப்போதும் உதவியாக இருக்கும் ஆசிரியையும் இரண்டாவது பாட வேளை முடிந்து என் அறையில் வந்து பார்க்க சொன்னேன்.

இருவரும் வந்தனர் . அவர் சொன்ன விசயம் என்னை அதிர்ச்சியில் ஆழ்த்தியது. அவர்கள் வீட்டில் அவர்களின் அம்மாவுக்கும் , அந்த பையனுக்கும் மட்டும் தான் இருக்காம். அவுங்க அம்மா அடிக்கடி ஆஸ்துமா இருக்கு சளி இருக்குன்னு ஜி.ஹெச் போகுமாம் சார். அப்படி போகும் போது ஏழு வருடங்களுக்கு முன் அந்த அம்மாவுக்கு இரத்தம் ஏத்தி இருக்காங்க.. அப்ப இந்த நோய் பரவு விட்டதாம். ரெம்ப கூலா சொல்லுறாங்க சார்…

அது சரி அவுங்க அம்மாவுக்கு எத்தின பிளட் எயிட்ஸ் அதுனால அவுங்களுக்கு வந்திருச்சு… இவனுக்கு எப்படி … இல்லை சார் இவனுக்கு முடியலைன்னு அவுங்க பிளட் தரும் போது வேறு ஒருவர் பிளட் எத்தி இருக்காங்க அது நால இரண்டு பேருக்கும் வந்திருச்சாம். இப்ப மாப்பாளையத்தில இருக்கிற செண்டரில வைத்தியம் பார்க்கிறாங்களாம்.

இப்ப அந்த பையன் நல்லா இருக்கான் சார்… அவனுக்கு புண்ணு கிடையாது. இப்ப பிளட் அவனுக்கு ஊறுதாம் .. அதுனால மாத்திரையும் குறைச்சுட்டாங்களாம்.. என பீதியை கிளப்பினார்.

உடன் இருந்த ஆசிரியர் இத என்னால நம்ப முடியல.. ஜி.ஹச் ல் இப்படி எல்லாம் நடக்குமா..? எப்படி அவரின் வீட்டுக்காரருக்கு எயிட்ஸ் இல்லாமல் இருக்கும் …மூத்தவனுக்கு இருக்கும் போது சின்னவனுக்கும் மட்டும் சாத்தியம் இல்லை… புரிய வில்லை.. எது எப்படியோ அவுங்க அம்மாவே தனக்கும் பையனுக்கும் எயிட்ஸ் இருக்குன்னு சொல்லிட்டாங்க.. உங்களுக்கு வேறு ஒரு நல்ல ஜீவன் அமெரிக்காவில் இருந்து போன் பண்ணி சொல்லிருக்கு.. நல்ல முடிவெடுங்க… எல்லார் உயிரும் சம்பந்த பட்ட விசயம் என நாசுக்காக டி.சி கொடு என சொல்லாமல் சொல்லி நகர்ந்தார் .

முழுஆண்டு தேர்வுக்கு இன்னும் மூன்று மாதங்கள் தான் .. அவனுக்கு கொப்பளம் மீண்டும் வந்தால் , அவனை வீட்டுக்கு அனுப்பி விடுவோம். அவனை அழைத்து பார்த்தேன். அவன் கையில் கொப்பளம் இல்லை. உடம்பில் எந்த காயமும் , இரத்த ஒழுக்கும் இல்லை. அவனை அன்புடன் உனக்கு காய்ச்சல் , புண்ணு வந்தால் சார்கிட்ட வந்து சொல்லனும். இந்த சாக்லெட் என பிறந்த நாளுக்கு மாணவர்கள் கொடுத்த சாக்லெட்டை கொடுத்து அனுப்பினேன். ( என் டேபிளில் மாணவர்கள் கொடுக்கும் பிறந்த நாள் சாக்லெட் அப்படியே இருக்கும் , வீட்டு பாடம் எழுதாத , சேட்டை செய்யும் மாணவர்கள், அழுகும் மாணவர்கள் என என் அறைக்கு வரும் மாணவர்களுக்கு அந்த சாக்லெட்டை கொடுக்கும் வித்தியாசமான பழக்கம் உண்டு.)

இறைவனை நம்பி ஒருவனுக்கு எழுத்தறிவு கொடுப்போம்.. ஏன் அவனே தனக்குள்ள வியாதிக்கு மருந்து கண்டு பிடிக்கும் வைத்தியனாக மாற்றுவோமே..?

உண்மை உணர்த்துவதும் ,தனக்குள் பொதிந்து கிடக்கும் அறிவை வெளிகொணர்வது தான் கல்வி என்றால் முயன்று பார்க்க தயார்.எனக்கு உதவிய அனைத்து நண்பர்களுக்கும் நெஞ்சார்ந்த நன்றி… !

கவலையளிக்கும் விசயம்… உதவ முடியுமா?

2012-01-23T10:50:00.000-08:00

கவலை அளிக்கிறது… ஆசிரியர்களில் இப்படியும் யோசிப்பார்களா? கடந்த வெள்ளி அன்று முதல் வகுப்பு ஆசிரியர் என்னிடம் மதிய இடைவேளையில் சார் உங்களிடம் முக்கியமான விசயம் சொல்ல வேண்டும் என வந்தார். புன்முறுவலுடன் சொல்லுங்க என்றேன். சார் அது வந்து என்று இழுத்தார். சரி என்னிடம் சொல்ல முடியாத விசயமா? அருகில் உள்ள உதவி ஆசிரியரிடம் சொல்லுங்க என்று அனுப்பினேன்.

பெண்கள் தங்களிடம் உள்ள விசயங்களை அல்லது உடல் சம்பந்தப்பட்ட விசயங்களை அடுத்த ஆணிடம் சொல்லுவதில்லை என்பதால்( இது தமிழ் கலாச்சாரம்)இந்த ஏற்பாடு.

அந்த ஆசிரியரும் உடன் வந்தார். சார் இவுங்க சொல்லுவதை கேட்டால் எனக்கே பயமாக இருக்கு என்றார். என்ன என்றேன். அவர் உடனே முக்கியமான விசயம் பேச வந்த ஆசிரியரை அதட்டி சொல்லுங்கப்பா..என்றார்.

”சார் ஐந்தாம் வகுப்பு பி பிரிவில் பயிலும் …… மாணவன் … “

”ம்… அவனுக்கு என்ன?”

“சார் … அது வந்து எனக்கு பயமா இருக்கு …எப்படி சொல்லுறதுன்னு தெரியல…”

“யாராவது ஒருத்தர் பீடிகை போடாம சொல்லுங்க…”

“ சார் அவனுக்கு எயிட்ஸ் இருக்காம்…”

சற்று நேரம் பேசாமல் அவர்களையே பார்த்தேன். இருவரும் முழித்தனர்.

தன்னிலை பெற்றவனாய் … “இதை யார் சொன்னது என்றேன்?”

’அவன் தம்பி தான் சார்”

”அவன கூப்பிடுங்க…”

”சரி வேணாம் … அவன் மூலமாக பிற மாணவர்களுக்கும் தெரிய வாய்ப்பிருக்கிறது ..கூப்பிட வேண்டாம் … எப்படி தெரியும் ?“

“சார் இன்னிக்கு பஸ்ஸில வரும் போது .. அவன் இரண்டு நாள வரல அது நால நான் எண்டா உன் அண்ணன் வரவில்லை என்று கேட்டேன் அதற்கு என் அண்ணுக்கு எயிட்ஸ் இருக்கு டீச்சர் இன்னிக்கு கொப்பளத்தில் இருந்து ரத்தம் அதிகமா வந்ததால் ரெம்ப முடியல… ஆஸ்பத்திரிக்கு கொண்டு போயிருக்கு எங்க அம்மா …”

என கதை சொல்லி முடித்தார்.

அவன் அம்மாவிடம் திங்கள் விசாரித்து விட்டு வர சொன்னேன். இன்று சொன்று நாளை விடை தெரியும். பையன் இன்னும் வரவில்லை.

அதை விட கொடுமை .. அந்த ஆசிரியர் அவனுக்கு டி.சி கொடுத்து விடுங்கள் சார். அவனிடம் பழகும் பிற மாணவனுக்கும் பரவும் என்றார்.

அது எப்படி பரவும் . …….(அவனை) நன்றாக தெரியும் . அவன் என்னுடன் நல்லா பழகுவான் அவனை தொட்டு தான் பேசுவேன்… பேசி இருக்கேன் அதினால தப்பு இல்லை… அப்ப எனக்கு எயிட்ஸ் வரும் என்கிறீர்களா? படிப்புக்கும் எயிட்ஸ் க்கும் சம்பந்தம் இல்லை என்று பெரிய விளக்கம் கொடுத்தேன்.

சார் அவன் உங்களுடன் பேசுவான் என்பதால் தான் அப்படி சொன்னேன் என்பதுடன் நிறுத்தாமல்.. சார் அவனுக்கு கட்டி வந்து இரத்தம் ஒழுகும் … சிறுவர்கள் அதிகம் உள்ள இடம்… பிற மாணவர்களுக்கு காயம் உள்ளது … இவனின் இரத்தம் அதில் பட்டால் ஒன்றும் அறியாத பிச்சுகளுக்கும் பரவும் அபாயம் உள்ளது …காயம் இருந்தால் நீங்களும் அந்த பையனை தொடாதீர்கள் என எச்சரித்தார்.

உலகம் எதை நோக்கி செல்கிறது. மனிதர்களிடம் மனிதாபிமானம் செத்து விட்டதா? அதுவும் என் ஆசிரியர்களா… ஒரு மாணவனை நோய்க்காக புறக்கணிக்க சொல்வது?

புரியாத புதிர்… உடம்பில் இருந்து வெளியேறும் இரத்த அணுக்கள் இறந்து விடும் தானே.. இறந்த இரத்த அணுக்களில் இருந்து எயிட்ஸ் பரவுமா? சந்தேகத்திற்கு விடை தெரிந்தவர்கள் தரலாம்.

எயிட்ஸ் நோயாளிகளின் தகவல்கள் மறைக்கப்படுவது அதாவது கமுக்கமாக வைத்திருப்பது நல்லது . இம் மாதிரியான சமுக மறுப்புக்கு ஆளாக நேரிடும். அதனால் அவன் தனிமை படுத்தப்படுவான். இந்த வயதில் அவனுக்கு எயிட்ஸ் வந்திருப்பது அவனின் குற்றம் அல்ல.. அதுபோல நமக்கும் பரவும் என்பதும் அறியாமை. இனி அவன் என் வகுப்பில் தான் அமருவான்…என்பது மட்டும் உறுதி.

மருந்திடப்பட்ட மரக்குச்சிகள்

2012-01-19T10:42:00.000-08:00

பள்ளி தோட்டத்தின் பலகையில்

பூக்களை பறிக்காதீர்கள்

கையில் குச்சியுடன் ஆசிரியர்

வகுப்பறையில்…!

-----------------------------

தெருவோர குப்பைதொட்டி

சிரிக்கிறது…

வகுப்பறையில் மாணவர்கள்…!

-----------------------------------

வகுப்பறையில்

மரப்பாட்சி பொம்மைகள்

ஆசிரியரின் தோதுக்கு ஏற்ப

ஆட்டுவிக்கப்படுகின்றன…

மரக்குச்சிகளின் தலையில்

மருந்திடப்பட்டாலும் …

அது உராய்சும் இடத்தின்

பதத்தை பொருத்தே

பற்றி எரிகிறது….!

விடியல்

2012-01-13T11:20:00.001-08:00

சேவல் கூவி அழைக்க

சூரியன் தன் கைகளை

மெல்ல விரித்து

இருளின் முகத்தை துடைக்க….

வீட்டு மேற்கூரை வழியாக

ஊடுருவி வெளிச்சம் ….

வெளிச்சமாக்குகிறது

இருளின் உச்சத்தில்

நீண்ட புணர்தலுக்கு பின்

கவ்வி பிடித்து தூங்குபவர்களின்

நிர்வாணத்தை …

அழுகையும் சிரிப்புமாய் இருக்கும்

கனவுலகின் கதவுகளை உடைத்து

குழந்தைகளுக்கு நிஜத்தினை…

வீடுகளற்று

மூத்திர வீதிகளின் முடுக்குளில்

நடுங்கும் பனியில்

பயந்துறங்கும் பிச்சைக்காரியின்

முலையினை….

தெருநாயின் அதிகாலை புணர்தலை

விரைத்தகுறியுடன் ஏக்கமாய்

பார்க்கும் தெருவோர அனாதைகளை…

இப்படியாக எங்கும் பரவிய வெளிச்சம்

தன்

அகண்ட கைகளைக் கொண்டு

அனைவரையும் தட்டி எழுப்புகிறது…

உறங்கிக் கொண்டிருந்த அனைத்தும்

விழிக்கின்றன..

விழித்துக் கொண்டிருந்த அனைத்தும்

உறங்கிப் போகின்றன…

உண்மையும் பொய்யாய்

பொய்யும் உண்மையாய்

கைகள் முழுவதும் விரிந்த நிலையில்

எல்லாம் நிகழ்கிறது…

சேவல் மீண்டும் கூவுகிறது…

மெல்ல கைகளை சுருக்கி

வீட்டின் மையப்பகுதியிலிருந்து ….

புறக்கடை வழியாக வெளியேறி

வீதிகளின் தெரித்து ஓடி

இருளுக்கு வழிவிடுகிறது

சேவலின் கூவல் நின்றபாடில்லை…!

கஷ்டப்படுத்தும் இந்த விசயத்தை புறக்கணீக்காதீர்கள்…!

2012-01-10T11:27:00.000-08:00

கல்வியின் பரிமாணம் உடனடி வேலைவாய்ப்பு ,கைநிறைய சம்பளம், முதலீடுக்கு தகுந்த உடனடி லாபம், உத்திர வாதம் அளிக்கும் எதிர்பார்க்கும் உடனடி பயன் என ரெடிமேட் உணவகம் போல் குறுகி விட்ட நிலையில் , நாம் நாட்டின் நன்மை நோக்கிய விழுமியங்களை எதிர்பார்ப்பது எந்த விதத்தில் சாத்தியம்.

நாம் மிருக காட்சி சாலைக்கு சென்று மிருகங்களை காணும் காலம் மாறி விட்டது. ஆம், முன்பெல்லாம் விடுமுறை என்றால் நாம் சித்தப்பா , பெரியம்மா வீட்டுக்கு சென்று, அப்படியே சென்னையில் மிருக காட்சி சாலைக்கு சென்று மிருகங்களை கண்டு களித்து வரலாம் என்று திட்ட மிடுவோம். இன்று காலத்தின் கோலம், கல்வியின் அவசர அதிரடி விழுமியத்தின் விளைவு, மனிதன் மனிதனை காட்சி பொருளாக காணும் அவல நிலைக்கு தள்ளப்பட்டுள்ளோம்.

கை நிறைய காசு , காண்பதற்கு அழகிய மனைவி என கூடிய வாழ்க்கையுடன் கண்ணுக்கு எட்டாத தொலைவில் வேலைவாய்ப்பை ஏற்படுத்திக் கொண்டு , நம் பெற்றோர்களை அனாதைகளாக விட்டுவிட்டு என்பதை விட அவர்களுக்கு நல்ல பாதுகாப்பு என்ற அடிப்படையில் வசதியான ஒரு முதியோர் விடுதியை ஏற்படுத்தி கொடுத்து சென்று விடுகின்றோம். விடுமுறைகளில் மிருக காட்சி சாலைகளுக்கு சென்று மிருகங்களை பார்க்க திட்டமிடுவது போன்று நம் மனித தெய்வங்களை ஒரு நாள் பயணமாக காணச் செல்கிறோம். எவ்வளவு மாறியுள்ளோம்? சாரி கல்வியின் விழுமியம் மாற்றியுள்ளது.

அது மட்டுமல்ல அறிவியல் பூர்வமாக சிந்திக்க தவறியுள்ளோம். எதற்கும் பயம். எதற்கும் போராட்டம். எதனாலும் நன்மை கிடைக்கும் என்றால் உடனே அதனை தேர்ந்தெடுக்க தவறுவதில்லை. அது போலவே எதனாலும் தீமை வந்துவிடுமென்றாலும் அதற்காக எப்போதும் விட பயப்படுவதும் உண்டு. சக்கரத்தை பார்த்து பயந்திருந்தால் , என்ன நடந்திருக்கும்? பல்பு எறிவதை கண்டு பயந்திருந்தால், இன்னும் இருளில் மூழ்கி இருப்போம். இப்படி அறிவியல் வளர்ச்சியினால் ஏற்படும் நன்மைகளை நாம் எப்போதும் தவறவிடுவதில்லை. அவை நம்மை அறியாமல் நம்மை தொற்றிக் கொள்ளுகின்றன. ஆனால் இன்று அணு உலை விசயத்தில் நம் விஞ்ஞானி அப்துல் கலாம் சொன்னாலும் ஏற்க மறுக்கிறோம். ஏன்? மிக தூய்மையான மின்சாரம் அணு உலையினால் கிடைக்கும் என்கிறார்களே? சிந்திக்க மறுக்கும் மனதினை கொடுத்ததும் , நம் கல்வி முறையில் உள்ள கோளாறை எடுத்து இயம்புவதாகவே நம்புகிறேன். மாற்று எரிசக்திக்கான உடனடி தேவை குறித்த ஆய்வை மேற்கொள்ள நம் கல்வி முறையில் மாற்றம் கொண்டு வர வேண்டும். தமிழக முதல்வர் அம்மாவின் பசுமை வீட்டு திட்டத்தில் சூரிய மின்கலன் கொடுக்கப்படுவது பாராட்டுக்குரியது.

மாணவர்களிடம் அறிவியல் ரீதியில் உண்மைகளை தேடும் கற்றலை தொடக்க கல்வியில் இருந்து தொடங்க வேண்டும். (அறிவியலில் கற்றல் ஆனந்தமாக இருக்க ஆசிரிய பயிற்றுனர்கள் மூலமாக அறிவியல் ஆனந்தம் பயிற்சி அனைத்து ஆசிரியர்களுக்கும் கொடுக்கப்பட்டு வருகிறது ) எதையும் பகுத்து ஆராயும் மனப்பான்மையை ஏற்படுத்த வேண்டும்.

ஆன்மிகத்தையும் கற்று கொடுக்க வேண்டும். அப்போது தான் மாணவன் அதனை மறுக்கும் போதோ , ஏற்கும் போதோ அதனை அறிவியல் சார்ந்து புறக்கணிக்கவோ , ஏற்கவோ முடியும். ஒரு சி.டி பிளையரில் சி.டியை போட்டு பாட்டோ, படமோ, பாடமோ கேட்கும் போது நாம் நடுவில் ஆப் செய்கிறோம். ஆனால் , அது மீண்டும் இயக்கும் போது , மீண்டும் முதலில் இருந்து தான் தொடங்குகிறது. எப்படி? ஏன்? இது எதனுடன் பொருந்தும் என சிந்திக்க செய்யுங்கள். இதனை நான் ரிக் வேதத்தில் உள்ள கருத்தோடு பொருத்திப்பார்க்கிறேன். பத்தாயிரம் ஆண்டுகளுக்கு ஒருமுறை மீண்டும் அந்நிகழ்வு நடக்கும் என்ற ரிக் வேத கருத்துடன் இந்த சி.டி மேட்டரை பொருத்தும் போது மீண்டும் அதே இடத்தில் ப்ளே(play) ஆவதைப் போன்று பத்தாயிரம் ஆண்டு கழித்து மீண்டும் இதே போல ஒரு போஸ்டில் உங்களுடன் இதே போன்று தொடர்பு கொள்வேன் என நம்புகிறேன்.

நான் எதிர்பார்க்கும் கல்வி மாணவர்களுக்கு கிடைக்க ஆசிரியர்கள் அற்பணிப்பு பண்புடன் மாணவர்களின் சிந்தனையை தூண்டும் விதமாக செயல் பட வேண்டும். மேலும் விழுமியங்களை அவனையறியாமல் உணரச் செய்ய வேண்டும் . எதிர்ப்பார்க்கும் நற்பண்புகளால் மட்டுமே நாம் இந்தியாவை முன்னேரிய உலக நாடுகளில் ஒன்றாக பார்க்க முடியும்.

மருத்துவர்களாலும் ஆசிரியர்களாலும் புறக்கணிக்கப்பட்ட குறைபிரசவக் குழந்தையின் உலக சாதனை

2012-01-06T11:46:00.000-08:00

வானொலியில் கணீர் குரலுக்கு சொந்தக்காரர் சேது ராக மாலிகா தன் குழந்தைக்காக பட்டுள்ள கஷ்டங்களை கேட்டால் நீங்கள் கண்ணீர் வடித்து விடுவீர்கள். எட்டுமாதத்தில் குறைபிரசவம் … தட்டை குச்சியாய் இன்குபேட்டரில் வைக்கப்பட்ட குழந்தையை பார்க்க வந்து செல்வோரும் , மருத்துவரும் இக்குழந்தை இறந்து விடும் .. இதற்கு மேல் செலவழிக்காதீர்கள் என கை விரித்து விட்ட நிலையில், தந்தை கல்யாண குமார சாமி மற்றும் ராக மாலிகாவின் தன்நம்பிக்கையிலும் தெய்வ நம்பிக்கையிலும் பிழைத்து வந்த குழந்தை விசாலினி. வாய் பேச வில்லை என மருத்துவர்கள் பலரை பார்த்துள்ளார். அனைவரும் அறுவை சிகிச்சை செய்தால் தான் பேச்சு வரும் என கைவிரித்து விட்டனர். இது குறைமாதத்தில் பிறந்ததால் குறைபாடுள்ள குழந்தை ,தட்டையான நாக்கு அறுவை சிகிச்சை அவசியம் என்று பலர் முன்மொழிந்த நிலையில் மருத்துவர் ராஜேஸ் விசாலினியிடம் புதைந்துள்ள அற்புத ஆற்றலை கண்டு ஐக்யு டெஸ்ட் எடுக்க வலியுறுத்தியுள்ளார்.

”என்ன கதை விடுறீங்களா ? குறைமாதம்… பேச்சுக்குறைபாடு … இதுக்கு எதுக்குங்க ஐக்யூ டெஸ்ட் ? யாராவது காதுல பூ சுத்தியிருப்பான் அவன் கிட்ட போய் சொல்லு …” என்று நீங்கள் விமர்சிப்பது கேட்கிறது. ”ஏன் ?எதற்கு? எப்படி? ” ன்னு கேள்வி கேட்டால் தான் அறிவு வளரும் என்றார் சாக்ரடீஸ். நம்ம விசாலினி இரண்டு மாத குழந்தையாக இருக்கும் போதே டாக்டரிடம்…” ஏன் இந்த விசமம் புடிச்ச மீனு தண்ணில இருந்தா உயிர்வாழுது.. தரையில வந்தா செத்து போகுது…? என டாக்டரிடம் கேள்வி கேட்டுள்ளார். இரண்டு வயதில் இப்படி சிந்தனை வர வாய்ப்புயில்லை என உணர்ந்த டாக்டர் ராஜேஸ் இவர்களை சரியான பாதையில் பயணிக்க வைத்துள்ளார். குழந்தைக்கு மதுரை மருத்துவர் உளவியலாளர் நம்மாழ்வாரிடம் பினேகாமத் என்ற ஐக்யூ டெஸ்ட் எடுத்தப்போது அவரின் நுண்ணறிவு திறன் ஈவு 225 என அறியப்பட்டுள்ளது.

சாதரண மனிதனின் நுண்ணறிவு திறன் ஈவு 90 முதல் 110 வரை. மனவளர்ச்சி குன்றியோருக்கு ஐக்யூ லெவல் 60 விட குறைவு. அதிக பட்சமாக கவிஞர் பைரன் ,தத்துவ மேதை பேகன் ஆகியோருக்கு ஐக்யூ 200 தானாம். அத விடுங்க நம்ம பில்கேட்சுக்கு ஐக்யூ லெவல் 160 தான் பாருங்களேன். இது வரை உலக சாதனைக்கான ஐக்யூ லெவல் சவுத் கொரியாவின் கிம் யுங் எங் (Kim Ung Yung) உடையதாம் IQ 210. உலக சாதனைக்கான பதிவில் வெளிவர போதிய வயது வரம்பு இல்லை என்பதால் இன்னும் பதியப்பட வில்லை எனப்து வருத்தத்துக்குரியது.

அதை விட கொடுமை பள்ளிகளில் இவரின் நுண்ணறிவு திறன் மற்றும் கேள்வி கேட்கும் ஆற்றல், தான் படிக்கும் வகுப்பையும் தாண்டி பிற வகுப்பு பாடங்களையும் ஒரே வருடத்தில் முடிக்கும் அறிவு ஆற்றலை கண்டு இவரை பள்ளியில் இருந்து தூரத்தியது தான். அதிக அறிவு ஆபத்து என்பது விசாலினியையும் விட்டு வைக்க வில்லை. தற்போது ஆறாம் வகுப்பு படிக்க வேண்டும் ஆனால் எட்டாம் வகுப்பு பாடங்களை படிக்கிறாள். இதற்கு இவளின் பெற்றோர்கள் போராடிய கொடுமைகளை அவரின் வீட்டில் அடிக்கி வைக்கப்பட்டிருக்கும் யுனிபார்ம்களே சாட்சி என இவரின் பாட்டி சிரித்து கொண்டு சொல்கிறார். இன்னும் கல்வி துறையில் இருந்து இவளுக்கு டபுள் புரமோசன் கொடுக்க எந்த ஆணையும் பெறப்படவில்லை என்பது கொடுமையிலும் கொடுமை. வெளிநாட்டில் இக்குழந்தை பிறந்திருந்தால் தலையில் வைத்து கொண்டாடியிருப்பார்கள். வெளிநாடுகளில் விசாலினியை தத்து கேட்கின்றனராம்.

விரைவில் தமிழக முதல்வர் அம்மாவின் பார்வை கிட்ட நாம் அனைவரும் ஒன்று சேர்வோம் . அதன் தொடக்கம் தான் அஅதிமுகவின் அம்பாசமுத்திரம் எம்.எல்.ஏ திரு. இசக்கி சுப்பையன் அவர்களிடம் பிளாக்கர்கள் ஒருங்கிணைந்து தமிழக முதல்வர் அம்மாவிடம் விசாலினியை சந்திக்கவும் அதன் மூலம் உலகுமுழுவதும் புகழ் பரப்பவும் ஏற்பாடு செய்து தருமாறு சிறிய வேண்டுகேளை கொளசல்யா , செல்வா ஸ்பிக்கிங் ஆகியோரின் முயற்சியில் வைத்துள்ளோம். மதுரையில் இருந்து சீனா அய்யாவும் , நானும் கலந்து கொண்டது மகிழ்ச்சிக்குரிய விசயமாகும்.

ஐக்யூ வைத்து மட்டும் விசாலினையை நாங்கள் முன் நிறுத்த வில்லை. அமெரிக்காவின் முன்னணி நிறுவனம் CISCO நிறுவனம் நடத்தும் ஆன்லைன் தேர்வான (எம்.பி.ஏ மற்றும் பி.டெக் , எம்.இ. மாணவர்கள் எழுதும் கடினமான தேர்வு) CCNA தேர்வை தன் பத்தாவது வயதில் எழுதி முடித்துள்ளார். நான்காம் வகுப்பு மாணவி எழுதும் தேர்வா இது?

இந்த தேர்வை தன் பன்னிரெண்டாவது வயதில் முடித்த பாகிஸ்தான் மாணவன் இர்டிசா ஹைதர் என்பவனை பாகிஸ்தான் நாடு ராணுவ வெப்சைட்டில் PRIDE OF PAKISTHAN என குறிப்பிட்டுள்ளதை நினைவுபடுத்த கடமைப்பட்டுள்ளேன். இந்தியாவில் விரைவில் இப்படிபட்ட அங்கீகாரம் பாளையங்கோட்டை விசாலினிக்கு கிடைக்க அனைவரும் முயற்சி மேற்கொள்வோம்.

இவர் அகில உலக சான்றிதழ்களான மைக்ரோ சாப்ட் நிறுவனத்தின் MCP , ORACLE நிறுவனத்தின் OCJP , CISCO நிறுவனத்தின் CCNA SECURITY முடித்துள்ளார். இன்னும் பல கணினி பட்டங்களை படிக்கிறார்.

அவருக்கு தமிழக கல்வி துறையின் சார்பாக கூடுதல் வகுப்பில் பயில்வதற்கான புரமோசன் ஒப்புதல் ஆணை பெறவும் ,அரசு முறையான அங்கீகாரம் வழங்கவும் அனைத்து பிளாக்கர்களும் உதவுவோம்.

எது விழுமியம் தரும் கல்வி..?

2012-01-04T10:29:00.000-08:00

கல்வி சாலைகள் பெருகிவரும் இச்சூழலில்.. கல்வியின் தரம் உண்மையில் வளமை குறைந்து இருந்த போதிலும், ஒரு வித மாய தோற்றத்துடன் ஓங்கி பெருகி இருப்பதைப் பார்க்கும் போது மக்கள் மேல் அதிர்ப்தி ஏற்படுகிறது. இன்னும் பள்ளி கூடங்களையும் , கல்லூரிகளையும் ஆரம்பிக்க தொழில் அதிபர்கள் ஆர்வம் காட்டுகின்றனர். ஏனெனில் , கல்வி தொழில் ஆகி, முதலீடை நஷ்டமடையாத அசையா வைப்பு நிதியாக்கி, வட்டிக்கு வட்டி கணக்கு பார்த்து குட்டிப் போடும் நல்ல தொரு வியபார நிறுவனமாக உள்ளது. போட்டி உலகில் பெற்றோரும் எதையும் எதிர்ப்பாராமல் இங்கு சேர்த்தால், நல்ல வேலை வாய்ப்பு உள்ளது , எதிர்காலம் உள்ளது என முடிவுடன் பணத்தை அள்ளி கொட்டுகிறார்கள். கல்வியின் முழு தன்மை , விழுமம் செயல் இழந்து , நவீனத்துவத்தில், பணம் போட்டால் பணம் என்கிற ரீதியில் செயல் பெற்று , உண்மையான ஆற்றலை , மனிதன் புதைத்துள்ள திறனை மங்கச் செய்கிறது.

இதன் வெளிப்பாடு தான் … லஞ்சம், லாவண்யம். ஆயிரம் அன்னஹசாரே வந்தாலும் , அடிப்படையில் ஓட்டையை வைத்துக் கொண்டு சட்டம் இயற்றி சரி செய்து விடலாம் என்றால் முடியவே முடியாது. ஆதியாய் இருக்கும் கல்வி முறையில் விழுமியங்கள் பூஜ்ஜியமாய் இருக்கும் போது , மேல்மட்டத்தில் லஞ்சத்தை ஒழிப்பது என்பது முடியாத காரியம்.

தேசிய ஒருமைப்பாடு , வேற்றுமையில் ஒற்றுமை என ஏட்டளவில் , உதட்டளவில் விழுமியங்களை கற்று கொடுத்ததன் விளைவு இன்று முல்லை பெரியாறு பிரச்சனை. அன்றாடம் ஒருவரின் தீக்குளிப்பு. சிந்தியுங்கள். தொடரும் வன்முறை தேசிய ஒருமைப்பாட்டுக்கு ஏற்படப்போகும் ஆபத்தை உணராமல் தொடரும் போரட்டங்கள். கேரள அரசின் பிடிவாதம். மக்கள் பற்றிய சிந்தைனைகள் அற்ற அரசியல் சதுரங்கத்தில் மக்கள் கொண்டுள்ள வெறுப்பின் வெளிப்பாடு போரட்டமாக வெளிப்படுவதை நினைக்கும் போது , கல்வி முறையில் இந்திய அளவில் விழுமியங்கள் குறைந்து , வட்டார அளவில் அவை வித்தியாசப் பட்டுள்ளதை தெள்ள தெளிவாக காட்டுவதாகவே அமைகிறது. நதி நீர் பிரச்சனையில் இந்தியா முழுவதும் நதிகளை ஒன்றிணைக்கும் முயற்சி செயலாக்கம் தரும் வகையில் நீர் பங்கீடுகள் தனிப்பட்ட ஆணையத்தின் கட்டுப்பாட்டில் , மாநில அரசுகளின் முடிவு இன்றி செயல் படும் அமைப்பின் கையில் கொடுக்கப்பட வேண்டும்.

எக்ஸைல் நாவலில் சாரு குறிப்பிடுவது போல தமிழ்நாட்டில் வாழ்வது என்பது” ஒவ்வொரு நாளுமே மரண வேட்டை தான். ஒவ்வொரு நாளுமே உயிரைத் தக்க வைத்துக் கொள்வதற்காகப் போராடுவதிலேயே நம் சக்தியெல்லாம் போய்விடுகிறது”. எங்கும் எதற்கும் போராட்டங்கள். அணு உலை, மருத்துவர் கொலை, நான்கு வழிச்சாலையில் கோர விபத்து சாலை முற்றுகை… என சொல்லி மாயாது. செய்திகளை தேடி அலைந்த காலம் மாறி விட்டது. இவையெல்லாம் அடிப்படையில் நம் கல்வி முறையில் எதோ ஒரு இடத்தில் ஏற்பட்டுள்ள தவறின் அடையாளமாகவே நான் கருதுகின்றேன். விதி மீறல் என்பதே விழுமியம் அற்ற தன்மை. கல்வி ஆசிரியர்களிடம் இருந்து முழுமையாக வெளிப்பட வில்லை என்பதை விட அடிப்படையில் ஆசிரியர்களின் நியமனம் தவறாக உள்ளது என்பதையே சுட்டிக் காட்டுகிறது. கற்பித்தல் என்பது செயல் வடிவமாக்கப்பட்டு , அதன் உண்மை நிலை அறியாத அல்லது புரியாத தன்மையுள்ள ஆசிரியர்கள் வேலையில் அமர்த்த படுவதால், மாணவனிடம் விழுமியங்களும் , கற்றல் திறன்களும் முழுமையாக சென்றடைய வில்லை . அதன் தொடர்ச்சி தான் மேல் படிப்பில் ஆதாயத்தை நோக்கிய கல்வி மதிப்பீடு . (தேர்ந்தெடுக்கப்பட்ட கல்லூரிகளைப் பொறுத்து வேலை வாய்ப்பு )

அரசு இலவச கல்வியை கொண்டு வருவதால் மட்டும் இந்த நிலமை மாறிவிடும் என்பது அபத்தம். அதற்காக பொது பள்ளிமுறையை வேண்டாம் என சொல்வது அதை விட அபத்தம். கல்வியாளர்கள் சிறந்த ஆர்வமுள்ள , தன் பணியின் தன்மையை முழுவதும் உணர்ந்த , அற்பணிப்பு எண்ணம் கொண்ட ஆசிரியர்களை துவக்கப்பள்ளி முதல் பணியமர்த்த வேண்டும். சிறப்பாக செயல் படும் அலுவலர்களை கவுரவிப்பது போல , வட்டார அளவில் ஆசிரியர்கள் தேர்ந்தெடுக்கப்பட்டு அவர்களின் ஆர்வம், அற்பணிப்பு , மாணவர்களின் விழுமியங்களின் மீது கொண்டுள்ள ஈடுபாட்டை கணித்து ஒரு விருது வழங்கலாம் . இது கூடுதலாக ஈடுபாட்டை கொடுப்பதுடன் பிற ஆசிரியர்களுக்கும் தூண்டுகோலாக அமையும். முதல்வர் ஆசிரியர்கள் மீது கவனம் செலுத்தி , நல்லாசிரியர் விருது போல ஒரு விருதை ஏற்படுத்தலாமே…!

மரம் வளர்கிறது..

2012-01-03T10:19:00.000-08:00

மரங்கள் வேர்விட்டு

ஓங்கி நிற்கின்றன..

மரத்தை சுற்றி ஓடியாடி திரியும்

சிறுவன் விழும் போது ….

உதிர்கின்ற இலைகள்

தளிர்க்கின்றன

ஒவ்வொரு முறையும்

விழுந்த சிறுவன் நம்பிக்கை பெறுகிறான்…

மரம் வளர்கிறது..

இவனும்…

ஆனால்… வளர்ந்த பின்

வெட்டுவதேன்..!

இலவச கல்வி அரசு அறிவிக்குமா…!

2012-01-02T10:46:00.000-08:00

அனைவருக்கும் புத்தாண்டு நல்வாழ்த்துக்கள்….

சமச்சீர் கல்வி சென்ற ஆண்டு நம்மை வாட்டி வதக்கி எடுத்து விட்டது. தரமான கல்வி அனைத்து மாணவர்களுக்கும் போய் சேர வேண்டும் என்பதில் அனைவருக்கும் மாற்று கருத்து இல்லை. இன்று மெட்ரிக் பள்ளிகள் பெருகி விட்ட சூழலில் ,சமச்சீர் பாடதிட்டம் , சமச்சீர் கல்வியில் சமம் என்ற மாய தோற்றத்தை உருவாக்கியுள்ளது. தமிழகத்தில் இன்னும் பல்வேறு போர்டுகள்(வாரியங்கள்) இருந்து கொண்டு , ஏற்றத்தாழ்வுகளை உருவாக்கி கொண்டு தான் உள்ளது. பொது பள்ளி முறை நடைமுறைப் படுத்தப்பட வேண்டும். இப் புத்தாண்டு தமிழக அரசு மூலமாக அனைத்து கல்வி நிறுவனங்களையும் ஏற்ற தாழ்வுகள் எதுவும் இன்றி , அரசு நிறுவனமாக மாற்றி, மாணவர்களுக்கு இலவச கல்வியை வழங்க வேண்டும். இதற்கு அனைத்து கல்வியாளர்களும், அரசியல் வாதிகளும், பொது மக்களும் அரசுக்கு தந்தி மூலம் கோரிக்கையை வைக்க வேண்டும் என்ற சின்ன ஆசையை இந்த புத்தாண்டில் முன் மொழிகின்றேன்.

ஜனவரி முதல் அனைத்து பள்ளிகளும் 4.40 மணி வரை செயல்பட்டு வருவது மகிழ்ச்சியை தருகிறது. இதனால், பத்தாம் வகுப்பு மாணவர்கள் கூடுதலாக கல்வி பயில்வார்கள். அவர்களுக்கு பாட சுமையை திணிக்கும் விதமாக பள்ளிகளில் ஆசிரியர்கள் செயல்படுவது, அவர்களுக்கு கல்வியில் இனிய சூழலை உருவாக்காது என்பது மட்டும் மாணவர் நிலையில் நின்று உறுதியாக கூற முடியும். ஆகவே, பாடங்களை முடிக்க வேண்டும் என்பதுடன் அவர்களின் மனநலனையும் புரிந்து செயல் பட்டால் கற்றல் இனிமையாக அமையும் . ஆசிரியர்கள் புரிந்து செயல்படுவார்கள் என நம்புவோம்.

மாணவர்களின் கல்வி பாதிப்படையும் என்பதால் , பெற்றோர்கள் கல்வி நிறுவனங்கள் வசூலிக்கும் தொகையை செலுத்தி படிக்க வைக்கின்றனர். டி கட்டணங்களில் அரசு விதிகளுக்கு புறம்பாக கட்டணங்கள் வசூலிக்கப்படுவதை நிறுத்த வேண்டுமென்றால் , அனைத்து பள்ளிகளையும் பொதுவாக அரசே எடுத்து நடத்த வேண்டும். கட்டண விவகாரம் என்பது முற்றுபுள்ளிப் பெறும்.

தரமான கல்விக்கு ஆசிரியர் மாணவர் விகிதம் மாற்றி அமைக்கப் பட வேண்டும். அண்மைக் கல்விக்கு ஆதரவு தர வேண்டும். இலவச கட்டாய கல்வி சட்டம் முழுமையாக நிறைவேற்றப்பட வேண்டும். இப்படி பல கனவுகள் காண்கிறேன். தமிழக முதல்வர் என் போன்ற ஆசிரியர்களின் கனவை எப்படி பொங்கல் போனஸ் முன்கூட்டியே அறிவித்தார்களோ அதேப்போன்று , பொது கல்வி முறையை செயல் படுத்த விரைவில் அறிவிப்பை வெளியிடுவார்கள் என நம்புகிறேம்.

சமூக அக்கறையில் ஈரோட்டின் பங்கு

2011-12-19T10:46:00.000-08:00

ஈரோடு தமிழ் வலைப்பதிவர்கள் குழுமம் சார்பாக கடந்த ஞாயிறு காலை பதிவர்கள் சந்திப்பு நடைப்பெற்றது. நாளைய சமூகத்தை உருவாக்குவதில் வலைப்பதிவர்களின் பங்கு எவ்வளவு முக்கியத்துவம் வாயந்தது என்பதை பதினைந்து நபர்களை மேடையேற்றி அறிமுகம் செய்து வைத்த போது உணரச் செய்தது.

ஏதோ பொழுது போக்குக்கு எழுதுபவர்களை , இணையத்தின் முக்கியத்துவத்தை இந்த அறிமுகம் உணர்த்துவதாக இருந்தது. புதியவர்களுக்கு ஒரு அறிமுகத்தையும் , அவர்களுக்கு தேவையான உற்சாகத்தையும் , அவர்களுக்கு ஒரு வழிகாட்டுதலையும் இந்த சந்திப்பு ஏற்படுத்தியுள்ளது என்பது யாராலும் மறுக்க முடியாது.

சமூகப் பங்களிப்பு என்பது எவ்வளவு முக்கியத்துவம் வாயந்தது என்பதை உணர்த்துவதாக சிறப்பு அழைப்பாளர் ஸ்டாலின் குணசேகரனின் பேச்சு அமைந்தது. எழுத படிக்க தெரிந்த எவனும் புத்தகம் வாங்கி வாசிக்க வேண்டும் என்ற உணர்ச்சிகரமான பேச்சு அவரின் சமூக அக்கறையை உணர்த்துவதாக அமைந்தது.

சமூகத்தில் சிறந்த தலைவனாக விளங்க உழைப்பும் , உண்மையும் எவ்வளவு முக்கியத்துவம் . ஆம் , பிற துறைகளில் உழைப்பும் , உண்மையும் முழுமையாக இல்லையெனில் பாதிப்பது என்பது அவர்களுக்கு மட்டுமே. ஆனால், சமூக பங்களிப்பில் என்பது இச்சமூகத்தின் ஒட்டு மொத்த சீரழிவுக்கும் காரணமாகவும் , சமூகத்தின் நேர்மறையான வளர்ச்சிக்கு பாதகமாக அமைந்துவிடும். கதிர் , தாமோதர் சந்துரு, ஜாபர் , லவ்டேல் ….என பெயர் சொல்லி எழுதி தள்ள ஆசை இருந்தாலும் ,ஈரோடு பதிவர்களின் தோழமைப்பண்பு, கட்டுப்பாடு, நம்பகத்தன்மை , கவர்ச்சி , அத்துடன் போட்டிப்போடும் பண்பு என்னை வியக்க வைக்கிறது. அனைவரின் ஒட்டுமொத்த உழைப்புக்கு கிடைத்த ஒரு பரிசு தான் அரங்கம் நிரம்பி வழிந்தற்கு சாட்சியாக அமைந்திருந்தது. கல்யாண விருந்தை போன்ற பிரமிப்பு… முதல் நாள் இரவில் இருந்து ஆரம்பித்து , மறுநாள் மதியம் வரை சைவம் , அசைவம் என நிறைவான விருந்து…. இவர்களால் மட்டும் எப்படி சாத்தியம் என மதுரை பதிவர்களை மட்டுமல்ல அனைத்து பதிவர்களையும் வாய் பிளக்க செய்யும் பெருமை ஈரோடுக்கே உள்ள தனித் திறமை ….!

இந்த சந்திப்பு எனக்கு நிறைய நண்பர்களை தேடி தந்துள்ளது. புது உற்சாகத்தை , உத்வேகத்தை கொடுத்துள்ளது. சமூகத்தில் எனக்குள்ள பொறுப்பை உணர்த்துவதாக உள்ளது. இது வருங்காலத்தில் நல்ல மாற்றம் தரும் அரசியல் அமைப்பாகவும் மாறலாம் என மணிஜி சிரித்துக் கொண்டே வெற்றி சின்னத்தை காட்டி … இந்த நிகழ்ச்சியின் வெற்றியை உறுதிப்படுத்துவதை பாருங்கள்.

இவர்களையும் புறக்கணிக்கலாமா?

2011-12-03T10:24:00.000-08:00

இன்று சர்வதேச மாற்று திறனாளிகளின் தினம். மாற்று திறனாளிகள் என்பதனாலே குறைபாடு உடையோர் மனம் நெகிழ்ந்து விடுவர் என்று கருதினால் , அது போன்று ஒரு மூடதனம் வேறு ஒன்றும் இல்லை. இந்த தருணத்திலாவது , (மருத்துவ ரீதியாக இந்தியாவில் வெளிப்படையாக தெரியக்கூடிய ஊனத்தில் சதவீதம் 60% உள்ளவர்கள் மட்டுமே ஊனமுற்றோர் என கருதப்படுகின்றனர்.) மாற்று திறனாளிகளை நினைவு கூர்ந்து அவர்களையும் சக மனிதனாக கருதி, நம்மோடு பிறரைப்போல வாழ மதிப்பு அளிக்க வாய்ப்பு கொடுப்போம்.

என் நண்பர் பேருந்தில் கன்னியாகுமரியிலிருந்து வரும் போது, ஒரு நிறுத்தத்தில் பஸ்ஸில் ஏறிய மாற்றுத் திறனாளியின் அடையாள அட்டையை வாங்கிப் பார்க்காமலே , ”உயிர வாங்குரதுக்குன்னே.. வந்துட்டானுங்க… பார்த்த நல்லா தானே இருக்க… டிக்கட் எடுக்க வேண்டியது தானே ”என ஏளனமாக பேசிய நடத்துனரை பற்றி சொல்லி வருத்தப்பட்டதை நினைவு கூற விரும்புகிறேன். உங்களுக்கும் இது போன்ற அனுபவங்கள் இருக்கலாம்.

தயவு செய்து அவர்களையும் கொஞ்சம் தயவு கூர்ந்து ஒரு சக மனிதனாக பாருங்கள். இன்று காலை என்னுடன் பயிற்சிக்கு வந்திருந்த ஆனந்த வள்ளி என்ற ஆசிரியை கூறும் போது, மனநலம் பாதிக்கப்பட்ட நபர் பேருந்து நிறுத்தத்தில் இறங்கிய பின், நடத்துனர் சக பயணியிடம் , ”இவன ல்லாம் பார்த்த மெண்டல் மாதிரியா தெரியுது, எங்க ஏறணும் , எங்க இறங்கணும் ன்னு தெரியுது.. இவனுக்கு போய் சலுகை கொடுக்குறாங்க பாருங்க..” என்று பேசியது குறித்து வருத்தம் தெரிவித்தார்.

இதற்காக நான் நடத்துனர் எல்லாம் மோசமாக நடந்து கொள்கின்றனர் என்ற வாதத்திற்கு வரவில்லை. நம்மில் பலர் மாற்று திறனாளிகளை ஊதாசினப்படுத்தியும், அவமதித்தும், ஒதுக்கியும், புறக்கணித்தும் , இவ்வுலகில் வாழ தகுதியற்றவர்கள் என்றும் கருதுகிறோம். ஆனால், பன்னிரெண்டாம் நூற்றாண்றிலே இரண்டாம் ஹென்றி அவர்கள் மனவளர்ச்சி குன்றியோருக்கு என சட்டம் இயற்றியுள்ளார். மரியா மான்டிசோரி அவர்கள் சென்னையில் மாற்று திறனாளிக் குழந்தைகளையும் பிற குழந்தைகளுடன் கல்வி கற்று தந்தார்.

இன்று நல்ல நிலையில் பயிலும் பள்ளிகளில் , மாற்று திறனாளிகளையும் சேர்த்து படிக்க வைக்க முடியும் என்ற நிலை வந்துள்ளது. மக்கள் தொகை கணக்கெடுப்பில் அவர்களையும் சேர்த்து எடுத்து வந்தாலும், பலரால்(குடும்பத்தில் உள்ளவர்களே) அவர்கள் புறக்கணிக்கப்பட்டு, சேர்க்கப்படாமல் உள்ளனர். இன்று அரசு அனைத்து மாற்று திறனாளிகளுக்கும் கல்வி கொடுக்க வேண்டும் என்ற நோக்கில் , உள்ளடக்கிய கல்வி திட்டத்தில் , அனைவருக்கும் கல்வி திட்டத்தில் சிறப்பு ஆசிரியர்களை நியமித்து உள்ளது. அவர்கள் மூலமாக சாதாரண பள்ளிகளில் பயிலும் குழந்தைகளுக்கும் சிறந்த கல்வியை வழங்கி வருகிறது. அதன் தொடர்ச்சியாக இன்று பணியில் உள்ள ஆசிரியர்களுக்கு சிறப்பு ஆசிரியருக்கான கல்வியையும் வழங்கி , ஆசிரியர்களை மாற்று திறனாளிகளின் சிறந்த கல்விக்கு உறுதுணைக்கு வழிவகுத்து, பயிற்சி அளித்து வருகிறது.

அரசு ஒருபுறம் மாற்று திறனாளிகளின் நலம் பற்றி சிந்தித்து , தொடர் நடவடிக்கை எடுத்து வந்தாலும் , சக மனிதர்களாகிய நாம் நம் மனதில் மாற்று சிந்தனைகளை விதைத்து , அவர்களை நம்மில் ஒருவராக கருதி , அவர்களுக்கு தன்னம்பிக்கையையும் , திறனையும் வளர்க்கும் விதத்தில் உறுதுணையாக இருக்க வேண்டும்.

பார்வையற்றோருக்கு கண் பார்வை மட்டும் தெரிவதில்லை. காது கேளாதவருக்கு கேட்கும் திறன் மட்டும் இல்லை. வாய் பேசத் தெரியாதவர்களுக்கு பேச இயலாது. கால் ஊனமுற்றோருக்கு காலின் செயல்பாடு குறைப்பாட்டின் அளவினைப் பொருத்து செயல்பாடு அளவு இருக்கும். இவர்களுக்கு எல்லாம் இவர்களின் ஊனம் தெரியும் அல்லது உணர முடியும். சற்று சிந்தியுங்கள். மனவளர்ச்சி குன்றியோருக்கு தனக்கு என்ன குறைபாடு உள்ளது என்பதே அவர்களுக்கு தெரியாது. நீ லூசு என்றாலும் புரியாது? அவர்களை புறக்கணிக்கலாமா?

மனவளர்ச்சிக் குன்றியோருக்கு தேவையான அதாவது அன்றாட செயல்பாடுகளான குளித்தல், பல்துலக்குதல், சிறுநீர் மற்றும் மலம் கழித்தல், உடம்பினை தூய்மையாக வைத்திருத்தல், சாப்பிடுதல், கை கழுவுதல் என்ற தன்னை தானே தூய்மையாக வைத்துக்கொள்ள உதவும் அடிப்படை செயல்பாடுகளை கற்றுத்தரும் சிறப்பு ஆசிரியர்களின் பணியினை நினைத்து பார்க்க வேண்டும். இத் தருணத்தில் அவர்களை பாராட்டியே தீர வேண்டும்.

இவர்களுக்காக செயல்படும் மதுரையை சார்ந்த அன்பகம் உண்மையிலேயே சிறந்த நிறுவனம் . அங்கு சிறப்பு ஆசிரியருக்கான பயிற்சி பெற நான் கடந்த முப்பது நாட்களாக செல்கிறேன். அந்நிறுவனத்தின் செயல்பாடுகள் அக் குழந்தைகளை அவர்கள் பராமரிக்கும் விதத்திலிருந்து தெரிந்து கொள்ளலாம். அக்குழந்தைகளை பார்க்கும் போது , கடவுள் இவ்வுலகில் நம்மை எவ்வளவு சிறப்பாக படைத்துள்ளார் என்பதன் அருமை புரியும். நாம் பிறந்த நோக்கத்தின் புனிதம் புரியும் . தவறு செய்த யாரையும் சிறைச்சாலைக்கு அனுப்ப வேண்டாம் இக்குழந்தைகளுடன் ஒரு வாரம் தங்கியிருந்து பணிவிடை செய்ய சொல்லுங்கள் . அதுவே அவர்களை நல்வழிப் படுத்திவிடும்.

மாற்று திறனாளிகள் பிறக்காமல் இருக்க….

1. சொந்தத்தில் திருமணம் வேண்டாம்( காதல் செய்தா சும்மா கட்டி வைங்கப்பா)

2. இரத்த வகை சரிபார்த்து திருமணம் செய்தல் நலம். ஆர்ஹெச்+ க்கும் + க்கும் திருமணம் நலம். _ க்கும் – க்கும் திருமணம் நலம். –க்கும் + க்கும் என்றாலும், + க்கும் – க்கும் என்றாலும் மருத்துவரை அணுகி ஆலோசனை பெற்ற பின் குழந்தைப் பெற்றுக்கொள்ளல் நலம்.

கற்பகாலத்தில் சந்தோசமாக இருக்க வேண்டும். மருத்துவர் ஆலோசனையுடன் மருந்து உட்கொள்ள வேண்டும்.

4. கருவுற்ற காலத்தில் அடிப்படாமல் பார்த்துக் கொள்ள வேண்டும்

5. பயிற்சி பெற்ற அனுபவமிக்க மருத்துவர் உதவியுடன் பிரசவம் பார்க்க வேண்டும்.

6. பிறந்தவுடன் குழந்தை அழுவதில் ஏற்படும் பிரச்சனைகளை பார்க்க வேண்டும்.

7. பதினெட்டு வயதுக்கு முன் திருமணம், மூப்பத்தைந்துக்கு மேல் திருமணம் செய்து , குழந்தை பிரசுவித்தல், குறைபாடுடைய குழந்தைக்கு வாய்ப்பளிக்கிறது.

பொய்

2011-11-30T11:04:00.001-08:00

ராகவன் மிகவும் கோபமாக சென்றான். அவன் இதற்கு முன் மோனிகாவிடம் இப்படி பேசியது கிடையாது. மோனிகா ராகவனின் ஒரே செல்ல மகள் . இரண்டாம் வகுப்பு படிக்கிறாள். மோனிகா அப்படி ஒன்றும் பெரிதாக பொய் சொல்லவில்லை.

வெள்ளி அன்று நடைப்பெற்ற பெற்றோர் ஆசிரியர் கூட்டத்தில் அவளின் ஆசிரியை ராணியை சந்தித்து பேசி விட்டு வந்தான். ஆசிரியை ராணியும் அப்படி ஒன்றும் தவறாக சொல்லி விட வில்லை. மோனிகா ஒரு டாக்கேட்டிவ். அதே சமயம் எதையும் அறிந்து கொள்ளும் ஆர்வம் அதிகம்.வகுப்பறையில் கூர்ந்து கவனிப்பாள் . எந்த பாடத்திலும் நூறு மார்க் எடுக்கவில்லை என இவனும் இவனின் மனைவியும் புலம்பி தவித்தார்கள். மோனிகாவின் அம்மாவும் ஆசிரியை என்பதால் , நிதானமாகவே, நல்ல முறையிலேயே மோனிகாவை பற்றி பேசினார்கள்.

பள்ளி விட்டு வந்தவுடன் பேசிக் கொண்டிருந்த ராகவன், கோபப்பட்டு பேசுவதை கண்டு , மாளவிகா தன் குழந்தையை அள்ளிக் கொண்டாள்.

“உங்களுக்கு என்ன பைத்தியமா பிடித்துக் கொண்டது …?பிள்ளையை அடிக்க வருகிற மாதிரி பேசுறீங்க… எதுனாலும் என் கிட்ட சொல்லுங்க..சும்ம அதட்டுற வேலையெல்லாம் வச்சுக்காதீங்க ”

”விவரம் தெரியாமா…பேசாத…. இன்னைக்கு பள்ளியில அவுங்க டீச்சர் …உங்கம்மா.. என்ன சொன்னாங்கன்னு கேட்டதுக்கு என்ன சொல்லி யிருக்கா..தெரியுமா..?”

”இதில என்னங்க தப்பு…. வந்தவுடனே எல்லாத்தையும் ஒப்பிச்சுட்டா… நல்ல விதமா தானே சொல்லியிருக்கா….”

”எதுக்கும் பொய் பேசுறது எனக்கு பிடிக்காது…இந்த சின்ன பொய் பெரிசா சொல்ல தோணும்”

”உங்க ஆபிசர் புத்திய குழந்தைக்கிட்ட காட்டாதீங்க…குழந்தைன்னா அப்படி தான் இருக்கும்… என் குழந்தை பொய் ஒண்ணும் சொல்ல வில்லை…”

“வீட்டில உங்கம்மா என்ன சொன்னாங்கன்னா.. ?எதுவும் சொல்லலைன்னு சொல்ல வேண்டியது தானே..”

“அவுங்க மிஸ் இன்னும் நல்ல சொல்லி தரட்டுமேன்னு … நல்லதா தானே சொல்லி யிருக்கா.. அதுக்கு ஏங்க இப்படி கத்து கத்துறீங்க…”

”அம்மா.. எதுவும் பேசல.. என்னை தான் நல்ல படிக்க சொன்னாங்கன்னு உண்மையை சொல்ல வேண்டியது தானே..”

“ என்ன புரியாம சொன்னதையே சொல்லிட்டு இருக்கீங்க… எங்க அம்மா உங்கள நல்ல மிஸ்ன்னு சொன்னாங்க…. நல்ல சொல்லி தருவாங்க… நீ கூர்ந்து கவனிச்சு செண்டம் எடுக்கணும்ன்னு சொன்னாங்கன்னு தானே சொல்லியிருக்கா… “

“ எப்படி பொய் பேசியிருக்கா பார்த்தியா… அப்பதான் இவ டீச்சர் நாளைக்கு உன்னை பார்க்கும் போது நல்ல படியா பேசுவான்னும்.. உன் கிட்ட தப்பா பேச மாட்டான்னு பிளான் பண்ணி பொய் பேசியிருக்கா…”

” இதில என்ன தப்பு இருக்கு… தன்னையும் பாதுகாத்து, என்னையும் நல்ல எண்ணத்தோடு சொல்லியிருக்கிற… அவ சமயோசித புத்தியை பாராட்டுங்க….”

ராகவன் தன் வேகன் ஆர் காரை ஓட்டி கொண்டே… ரெம்ப கோபப் பட்டுவிட்டோமோ என யோசித்தே வண்டியை திருப்பும் போது… வண்டி மாறு பட்ட தன்மையுடன் ஓடுவதை காண்கிறான். மெதுவாக காரை நிறுத்தி பார்க்கும் போது முன் சக்கரம் பஞ்சர் . அருகில் உள்ள பெட்ரோல் பங்கில் காற்று நிரப்பி அருகிலுள்ள பஞ்சர் கடையை விசாரித்து விரைந்தான். இரண்டு நாட்கள் முன் தான் காரினை கேட் கதவில் மோதி முன்னாடி பேனட் நெளிந்து இருந்தது.

கோபம் மனிதனை எல்லா வழிகளிலும் சீரழித்து விடும் என்பது அவனுக்கு இப்படி பட்ட கஷ்டங்கள் வரும் போது தான் உணரச் செய்யும். மோனிகா மீதான கோபத்தில் வந்தவன் , எதிரில் வரும் லாரியை கவனியாமல் முந்தி செல்ல எத்தனித்தான், முடியாததால் குப்பை நிறைந்த அந்த மேட்டுப் பகுதியில் வண்டியை ஏற்றி இறக்க ஏதோ குத்தி பஞ்சராகி யிருந்தது .

”அண்ணே , வண்டியை கொஞ்சம் முன்னாடி கொண்டு வாங்கண்ணே…” என்ற சிறுவன் இவனை பார்த்தவுடன் , ”என்ன சார் .. பஞ்சரா..?” என்று சொல்லிக் கொண்டே ஸ்பானரையும் , சாக்கியையும் கொண்டு வந்தான்.

“என்ன சார் … பார்த்து ஓட்டக்கூடாதா…? ரோடாவா சார் இருக்கு நாம தான் சுலோவா வரணும் … வேகமா வந்த இப்படி தான் சார் ஆணி குத்தி பஞ்சராயி போகும்…” என்ற சிறுவனின் பேச்சில் ஆர்வமாகி..

“ சரி என்ன செய்ய.. பஞ்சர் சொல்லிகிட்ட குத்துது…?”

ஜாக்கியை கொண்டு வண்டியை ஏற்றினான். நாலு போல்ட் நட்டை கழட்டினான், டயரை அப்படியே உருவினான்.

“எத்தனை பஞ்சர்ன்னு பாருப்பா…சீக்கிரம் ஒட்டிக் கொடு…”

“சார் இது டீயுப் லஸ் டையர் சார்.. இதுக்கு முன்னாடி பஞ்சர் பார்த்தது இல்லையா….? சார் பொறுமையா பாருங்க.. தண்ணில முக்கி ஏர் போற இடத்தை கண்டு பிடிக்கணும்… அப்புறம் இந்த மெழுகு போன்ற இந்த குச்சியை அங்க வைச்சு ஒரு அமுக்கு தான்…”

“ டேய்… காத்து போற இடத்தில எதாவது இருக்கான்னு பாருடா.. ஆணியிருந்த எடுத்து போடு…”

“சார்… ஆணியில்ல சார் … இது பீங்கான்.. இத வெளிய எடுக்க முடியாது… உள்ள தான் தள்ளி விடணும்..”

“டேய் உள்ள போனா .. அது மீண்டும் பஞ்சராகாதா..?”

“ சார் பீங்கான் பொடி பொடியா ஆகிடும்.. கவலை படாதிங்க.. அது டியுப் லஸ்…ஒண்ணும் ஆகாது” என சொல்லி கொண்டே பீங்கானை டயரில் ஓட்டை போட்டு உள்ளே தள்ளினான்.

”சார்.. முப்பது பாயிண்டு ஏர் வச்சுருக்னேன்…போதுமா…”ராகவன் தலையாட்டி முடிக்கும் முன் சக்கரத்தை நோக்கி நகர்ந்து இருந்தான்.

டயரை மாட்டிய சிறுவனை பார்த்து…

“உனக்கு என்ன வயசு இருக்கும்..?”

ராகவனை ஒருவித சந்தேக பார்வை பார்த்து…( தொழிலாளர் நலவாரிய அதிகாரியாக இருக்குமோ என்று )

“சார் சத்தியமா… பதினெட்டு சார்.. பார்த்த என்ன ஒரு பத்து வயசு

பையனா தான் நினைப்பீங்க..”

“என்னை விட சின்ன பசங்கள் எல்லா என்ன போடா வாடான்னு பேசும் போது எனக்கு….. கோபமா தான் வரும்.. இருந்தாலும் என்ன செய்ய முடியும்.. என் உருவம் அப்படின்னு நானே நொந்துக்குவேன் சார்…”

”நீங்களும் அதே போல ஏமாந்திட்டீங்க..….இத விட சார் ஆறாம் வகுப்பு தான் சார் படிப்பான் .. என்ன விட கொஞ்சம் ஹைட்டு ஜாஸ்தி .. என்ன போடா.. அந்த பாலை(பந்தை) எடுத்து போடுடான்னு அடிக்க வர்றான்…எல்லாம் என் தலையெழுத்து சார்..”

“எத்தனாவது வரை படிச்சு இருக்கா…?”

”அத விடு சார்… என்ன சார் .. வண்டியை எங்க கோர்த்திருக்கீங்க…?”

“…..”

“வண்டியை பார்த்து ஓட்டணும் சார்… லேசா இடிச்சா கூட காசு எக்கு தப்பா ஆகும் சார்… ஒரு பத்தாயிரம் பிடிங்கிறுவானுக… நாம சுதாரிப்பா வந்தாலும்.. போறவன் வந்து இடிச்சுட்டு போயிடுவான் சார்…”

“நல்ல பெரிய மனுசனாட்டம் பேசுறடா..”

“சார் ..நிசமாலுமே … நான் பெரியவன் தான் சார்.. என்ன சின்ன பையன்னு நினைச்சுட்டீங்கல்லா.. சின்ன பையன்னா வேலைக்கு சேர்ப்பாங்கலா சார்…”

சிறுவன் தன் வயதை மறைக்க தன் வேலையை காப்பாற்ற , எப்படி சமாளிக்கிறான் என்பதை ரசித்தான். வாழ்க்கை போராட்டத்தில் இது போல சில பொய்களை சொல்லி தான் காலம் தள்ள முடியும் . இந்த மாதிரி பொய்கள் அவனையும் அடுத்தவரையும் பாதிக்காது என நினைத்த போது அவன் மனைவி மாளவிகா போன் வர ….

“சொல்லு.. டயர் பஞ்சர் பார்த்துகிட்டு இருக்கேன்.. இப்ப வந்துடுவேன்.. மோனிகா படிச்சாளா… அப்பா கோபமெல்லாம் ஓடி போச்சுன்னு சொல்லு.. அவளுக்கு பிடிச்ச இடியாப்பம் வாங்கிட்டு வந்திடுறேன்..”

சாவியே இல்லாத கதவு

2011-11-29T10:16:00.001-08:00

பூட்டப்பட்ட கதவுக்கு

கனவுகள் திறவுகோல்கள்

இரவுகளின் உறக்கங்களில் திறப்பவை

பகலின் வேதனைகளுக்கான கதவின் கைபிடிகள்

தட்டாமலே திறந்து கொள்கின்றன….

புறக்கண்கள் மூடும் போது

வெளிச்சத்தை புறக்கணித்து

இருளில் திறந்து கொள்கின்றன…

அலைக்கற்றை ஜாமீன் போல்

எதிப்பார்ப்புகள்….

பரபரப்புகள்..

பதற்றங்கள்….

பீதிகள்… என எதுவும் அற்ற

சந்தோசத்தை தரும் கனவுகளுக்கான

சாவிகளை தேடிக் கொண்டு….

பூட்டிய அறைக்குள்

இருபதாம் நூற்றாண்டின் பெண்கள்….

”சாவியே இல்லாத கதவு என ஒன்றும் கிடையாது”

என்ற நம்பிக்கையுடன்…!